Arıçılıq gəlirli sahə olmaqla yanaşı, həm də zəhmət, halallıq istəyən sahədir. Arı zəhməti və halallığı sevir, sahibindən halallıq gördükcə həvəslə işləyir, məhsulunu artırır. Əməli saleh olmayan arıçının təsərrüfatına mütləq zərər gəlir.
Son illər ölkəmizdə
arıçılığın inkişafı üçün dövlət tədbirləri artırılmışdır. Gözəl təbiətə malik,
şəfalı bitkiləri ilə zəngin olan Qarabağ torpaqlarının azad olunması nəticəsində
arı ailələrinin Kəlbəcər, Laçın kimi güllü-çiçəkli, bol məhsullu yerlərə aparılması arıçılığın inkişafına ciddi təkan vermişdir.
Keçmiş məcburi köçkünlərin doğma dədə-baba torpaqlarında arıçılıqla məşğul
olmaları isə onlar üçün böyük
sevincdir. Xocalı rayonu qeydiyyatında (Kərkicahan qəsəbəsi və Xankəndi şəhəri ilə birlikdə)
5679
arı ailəsi mövcuddur ki, bu arı ailələri ilə peşəkar arıçılar məşğuldur. Əməksevər
xocalılar, xankəndililər məskunlaşdıqları
şəhər və rayonlarda bu
qədim tarixə malik sahəni davam etdirir. Artıq onlar da öz arı ailələrini
Kəlbəcər, Laçın ərazilərinə aparırlar.
Bu il ölkəmizdə yağışlı günlərin
çox olması dağlıq yerlərdə arıçılığa mənfi təsir göstərib. Buna baxmayaraq,
aran yerlərində vəziyyəti qənaətbəxş saymaq olar. Aran balının özünəməxsus təamını, keyfiyyətini, faydasını, həm də əlverişsiz mövsüm
olsa belə, bal tədarükünün mümkün olduğunu nəzərə alan arıçılar arı ailərini
aran rayonlarında saxlamağı məsləhət görürlər.
Belə şəxslərdən biri Xankəndi
şəhərindən olan gənc arıçı Şəhriyar Quliyevdir. Şəhriyar Quliyev Xocalı rayon İcra
Hakimiyyəti Aparatında Vətən müharibəsi
iştirakçıları və şəhid ailələri ilə işin təşkili şöbəsinin müdiri vəzifəsində
çalışır. Hərbi xidmət
zamanı Aprel
döyüşlərində iştirak edən, Vətən
müharibəndə könüllü olaraq silaha sarılan Şəhriyar Quliyev "Suqovuşanın
azad olunmasına görə", “Vətən müharibəsində iştirakına görə” medalları ilə
təltif edilib. Həyat yoldaşı Fatimə xanım ingilis dili müəllimidir. Quliyevlər
ailəsi həm də arıçılıqla məşğuldur. Şəhriyar Quliyev 
ziyalı ailəsində doğulub, anası Ülkər xanım ibtidai
sinif müəllimi, atası Xudayar bəy riyaziyyat müəllimidir. Gənc arıçı arıçılığın
bəzi sirlərini 16 yaşından atası Xudayar Quliyevdən öyrəndiyini deyir. I
Qarabağ müharibəsi veteranı, savadlı müəllim olan Xudayar müəllim həm də gözəl
ailə başçısıdır.
Şəhriyar Quliyev hal-hazırda Şəmkir rayonunun
Ağlavaşlı kəndində 80 arı ailəsinə qulluq edir. Arıçı deyir ki, insan gərək
asudə vaxtlarının səmərəli keçməsi üçün özünə məşğuliyyət tapsın. Arıçılıq
həvəsli sahə olsa da, arılara vaxtlı-vaxtında qulluq etmək, qayğısına baxmaq lazımdır.
Halallıq da öz yerində. Aran balı faydasına görə dağ balından heç də geri
qalmır. Bir çox həkimlər, alıcılar faydasına görə məndən aran balı istəyirlər.
Ən faydalı bal cökə, biyan, qaratikan və s. bitkilərin çiçəklərindən olur.
44 günlük Vətən müharibəsində
yazılan Şanlı Zəfər tarixində öz imzası olan veteran döyüşçümüz torpaqlarımız
uğrunda hər zaman döyüşə hazır olduğunu deyir. Gənc arıçı gördüyü işlərindən zövq alır, qalib ölkənin qalib vətəndaşı
kimi özünü xoşbəxt hiss etdiyini qürurla ifadə edir:
“İndi insan gündən-günə çiçəklənən
ölkəmizdə daha çox əməklə məşğul olmaq istəyir. Əminik ki, xocalılar, xankəndililər
tezliklə öz doğma torpaqlarına qayıdacaqlar və orada təsərrüfatın bütün sahələri
ilə, o cümlədən qədim arıçılıq
sahəsi ilə də məşğul olacaqlar”.
Qalib
BƏYMƏMMƏDOĞLU